Nokuo Tuh Apatut Ondomon Kinaantakan Intohu Inggonom? (Triple Six)

Di ontok Tadau Minggu, ko-6 vuhan ko-6, toun 1976, kivaa kinaantakan kopoluo kozo do ginavo do tuhun Pogun Sabah. Iso' kapal ii sinakazon di Huguan Montili Pogun Sabah, Tun Fuad Stephens, tohu Montili, Datuk Salleh Sulong, Datuk Peter Mojuntin, Datuk Chong Tain Vun, iso' Panakadai Montili zi Datuk Darius Binion, ii Monunuat Pointatap di Huguan Montili, Wahid Peter Andu, om apat po suvai.

Mantad zioho Labuan, suminoomo do huguan hongkod pogun kokomoi do kapataakan hak do tumau Pogun Sabah kumaa doid hongon polinta hongkod. Au nakunan ii. Komozon diti do au zioho nasaga do onuon do polinta hongkod o pinuavangan tumau do Pogun Sabah.

Tumanud di Datuk Dr. Jeffrey Kitingan, au katanud do undang-undang do onuon do polinta hongkod o kotos saahom tana diti. Pogun Sabah sanganu do kotos diti om mozo do Pogun Sabah do songkuo panaak dosido kumaa doid polinta hongkod. Okonko zi Dr. Jeffrey Kitingan no o nokoboos do miaga diti. Kivaa piipio huguan nokoboos do miaga diti, miaga po toi di Datuk Yong Teck Lee.

Natagakan o Pogun Sabah do huguan tongopulokis. Om natagakan do pazung o tuhun Kadazan songian kaatu ii kapal dii. Vaza do kinaantakan talaat diti kakaal do okito do tumihombus do baabaino id Pogun Sabah, om id taatangah do tuhun Kadazan.

Do baino, apat ngoopod (40) toun no nakatahib. Montok di tongotuutuo, kakaal dati dioho kopiuman linuo do ginavo tu osomok kozo doid kinaantakan dii. Montok di omuhok po, ogumu dati dioho do au nokoiho kinaantakan diti. Kumaa do vookon, miaga po dati do minoginipi. Montok di tangaanak, okudi kozo dati dioho do nokoiho diti. Nung kivaa di oongou dioho, miaga kozo dati do iso' susuzan toomod ii.

Kinaantakan diti okonko ouhan do monoimo. Oluo do ondomon. Mogot do kadah nodii ondomo, ka dati do vookon.

Nga okonko ingkaa dati ii hobi koontok. Kumaa do tuhun Kadazan, au nogi dati mimang ii huguan Kadazan di nokoundun dii do hiivan o kinaantakan diti. Mositi do ondomon. Mositi do soovon. Mositi do au hiivan. Mositi do kivaa popotihombus do pinimpaagatan do huguan ngaavi diti. Mositi do potihombuson do mogium lahan do mamagampot tudduvon do tinau ii ponokotuddu do huguan ngaavi diti. Miho dodizon o pinulokis om pinaagat dioho dii do ponokotiuvan montok do tinau hobi no ii huguan ngaavi do baino om ii kihizab do dumadi do huguan do tuhun Kadazan do toduuk tadau.

Nga id daasom do 40 toun, ogumu kinaantakan om vookon dii minonimbit kohizaban do tuhun Kadazan. Vookon kondiu ngaavi diti mantad habus tinimungan tuhun Kadazan. Nga kivaa nogi mantad id suang tinimungan tuhun Kadazan sondii.

Nunu ma vookon kinaantakan diti?

Oputan vagu...