KINAANTAKAN II APATUT KAPANAAK KAVAKASAN

Nokuo tu moboos do "Kinaantakan ii apatut kapanaak kavakasan"? Ingkuo iso kinaantakan ii kopoluo ginavo kaanu mogovit doid kavakasan?

Linuo ginavo nopo nga iso topiumanan di 'negative' toi topiumanan di aiso nodii kahansanan, pomumusoou di mokiaha nopo, magampu om tonudon nopo nunu booson toi maan do tuhun suvai. Koontok do toimoon do tuhun Kadazan o katapatan do kinaantakan di toun 1976 om momuondom do popotihombus nunu ii hizab do huguan dioho ii nokoundun.

Atahang do hizab nopo do huguan Kadazan ngaavi diti nga do kopiiso daa tinau Kadazan mooi kobuu om kotopong do tinau suvai ii nokobuu no kozo. Isai dii popoinsavat do bondila do Kadazan do baino nung okon no ko huguan Kadazan baino ii opulokis doid nunu noopo kaganaan.

Koiho dati vookon Kadazan kokomoi di Martin Luther King, Jr ii nimaan dusooh di toun 1968 sabap no do mokianu kopotutan montok do tuhun Negro id America (Pogun Molikan). Mantad do kinapatazon disido do nokomogot ningkokoton tuhun Negro id America.

Ondomo do kiginumu 6 lizong o tuhun Johudi (Jews) do nimaan dusooh di Hitler. Okonko okudi 6 lizong. Nga okito do doiti doiho tuhun Johudi do papatantu do nomboo pakaazan do kaantakan id pogun nokobuuh id nomboo do poingizon zioho. Kaampai no Pogun Molikan. Au nimaan dioho hiivai kinaantakan dii nga' dinadi dioho ii do ningkokoton do vinakas do piisaan dioho sabaagi iso' bangsa. Ogumu tinimungan, bangsa om kivaa piipio pogun id vinoun do abaazatan do Johudi. Nga' natagakan naku zioho do kahansanan? Natagak naku zioho do mantad soibau do tana?

Dadi kuo ka do tuhun Kadazan? Au naku onuon dioho kosivatan o kinaantakan di toun 1976 do lahan koponginvaguvan do hizab dioho sabaagi do iso tinau? 40 toun no nakatahib! Nohiivan nodii do vookon nunu ii tuddu do huguan Kadazan di poguhu. Kogumuan sukod vagu au nokoiho kinaantakan. Ingkuo dii koiho sinakagon tiinu do tuhun Kadazan nung au no taandakon o kaandaman do kinaantakan talaat dii?

Kada daa do aantakan do atahup kohizaban do tuhun Kadazan!